Приложение 2. Новгородская 1-я летопись о XIII веке

We use cookies. Read the Privacy and Cookie Policy

Приложение 2. Новгородская 1-я летопись о XIII веке

В лето 6721 (1213). В Петрово говенье изъехаша Литва безбожная Плесков и пожгоша, плесковицы бо бяху в то время изгнали князя Володимира от себе, а плесковицы бяху на озере, и много створиша зла и отъидоша.

В лето 6736 (1228). Князь Ярослав поиде в Плесков с посадником Иванком и тысячским Вячеславом. И слышавше плесковицы, яко идет к ним князь, и затворишася в городе, не пустиша к собе; князь же, постоя на Дубровне, вспятися в Новгород, промкла бо ся весть бяше си в Плескове, яко везет оковы, хотя ковати вяцшее мужи. И пришед, створи вече в владычни дворе и рече, яко «не мыслил есмь до плескович груба ничегоже; везл есмь был в коробьях дары: паволоки и овощь, а они мя обощъствовали» и положи на них жалобу велику. Тогда же приведе полки ис Переяславля, а река: «Хочю ити на Ригу»; и сташа около Городища шатры, а инии в Славне по дворам. И вздорожиша все на торгу: и хлеб, и мясо, и рыбы, и оттоле ста дороговь: купляху хлеб по 2 куне, а кадь ржи по 3 гривне, а пшеницю по 5 гривен, а пшена по 7 гривен, и тако ста по 3 лета. То же слышавше плесковици, яко приведе Ярослав полки, убоявшеся того, взяша мир с Рижаны, Новгород выложивше, а рекуче: «то вы, а то новгородцы, а нам ненадобе; но оже поидуть на нас, то вы нам помозите»; и они рекоша: «тако буди»; и пояша у них 40 муж в талбу. Новгородцы же, уведавше, рекоша: «князь нас зовет на Ригу, а хотя итти на Плесков». Тогда же князь посла Мишю в Плесков, река: «поидите с мной на путь, а зла до вас есмь не мыслил никоторого же; а тех ми выдадите, кто мя обадил к вам». И рекоша плесковицы, приславше Гречина: «тобе ся, князь, кланяем и братьи своей не выдаем, а с рижаны есме мир взяли. К колываню есте ходивше, серебро поимали, а сами поидосте в Новгород, а правды не створися, города не взясте, а у Кеси такоже, а у Медвеже головы тако же; а за то нашю братью избиша на озере; а инии поведени, а вы, раздравше, та прочь; или есте на нас удумали, то мы противу вас с святой богородицею и с поклоном, то вы лучше нас исечите, а жены и дети поемлете себе, а не луче погании; то вас ся кланяем». Новгородцы же князю рекоша: «Мы бе своея братья бес плесковиц не имаемся на Ригу; а тобе ся, княже, кланяем». Много же князь нудив, ине яшася по путь. Тогда же князь Ярослав полкы свои домовь посла. Плесковици же тогда бяху подвегли немцы и чудь, латыголу и либь, и отпустиша я опять, а тех, кто имал придаток у Ярослава, выгнаша ис Плескова: «пойдите по князю своем, нам есте не братья». Тогда же Ярослав поиде с княгинею из Новгорода Переяславлю, а Новегороде остави два сына своя, Феодора и Александра, с Федором Даниловичем, с тиуном Якимом.

В лето 6740 (1232). Придоша ис Чернигова Борис Негоцевич, Михал с братом, Петре Вадовиковиц, Глеб Сменов брат, Миша, с князем Святославом опять в Русь, уразумев, яко си солгаша им, они же вгонивше в Плесков, яша Вячеслава, и бивше его, оковаша и. В Нове же городе бысть мятеж велик, не бяше бо князя Ярослава, в Переяславле бе тогда, и приехав князь ис Переяславля, изима плесковици и посадил на Городищи в гридницы, и посла в Плесков, рече: «мужа моего пустите, а тем путь покажите прочь, откуда пришли». Они же сташа за ними крепоко, рекоша: «прислите к ним жены их и товар, тоже мы Вячеслава пустим, или вы собе, а мы собе». И тако быша без мира лето все, и не пусти князь гости к ним, и купляху соль по 7 гривен берковск: и пустиша Вячеслава, князь пусти к ним жены Борисову, Глебовую, Мишиную, а мира не взя. Бысть на зиму, придоша плесковици, поклонишася князю: «ты наш князь», и вспросиша у Ярослава сына Федора, и не да им сына, и рече: «се даю вы шюрина свои Гюргя», и ведоша и, поимше, Плескову, а Борисове чади показаша путь с женами. Они же идоша в Медвежю голову.

В лето 6741 (1233). Изгониша Изборск Борисова чадь с князем Ярославом Володимировичем и с немцы. Плесковици же, оступивше Изборск, измаша и князя, и немцин убиша Данилу, а инии побегоша, и даша я великому Ярославу, князь же, исковав, поточил в Переяславль.

В лето 6748 (1240). Взяша немцы, медвежане, юрьевцы, вельяндцы с князем Ярославом Владимировичем Изборск. И приде весть в Плесков, яко взяша немцы Изборск, и выидоша плесковичи вси, и бишася с ними, и победиша я немцы. Тут же убиша Гаврила Гориславича воеводу, а плескович гонече, много побиша, а инех руками изымаша. И пригонивше под город, и зажгоша посад всь, и много зла бысть; и погореша церквы и честные иконы и книги и евангелия и много сел попустиша около Плескова. И стояша под городом неделю, но города не взяша; но дети поимаша у добрых муж в тали и отъидоша проче, и тако быша без мира, бяху бо перевет держаче с немцы плесковичи, и подвели их Твердило Иванкович с инемы, и сам поча владети Плесковом с немцы, воюя села новгородские, а инии плесковичи вбежаша в Новгород с женами и с детми.

В лето 6750 (1242). Поиде князь Олександр с новгородцы и с братом Андреем и с низовцы на Чюдскую землю на немцы и зая все пути и до Плескова; и изгони князь Плесков, изима немцы и чюдь и сковав поточи в Новгород, а сам поиде на чудь.

В лето 6773 (1265). Тогда вбегоша в Плесков с 300 литвы с женами и с детми, и крести я князь Святослав с попы плесковскими и плесковичи; а новгородцы хотеша их исещи, но не выда их князь Ярослав, и не избиени быша.

В лето 6774 (1266). Посадиша плесковичи у себя князя Довмонта Литовского. Того же лета вложи Бог в сердце Довмонту благодать свою побороти по святой Софьи и по святой Троици, отмстити кровь християнскую и поиде со плесковичи на поганую литву и повоеваша много, и княгиню Гердениеву взяша, и два княжича взяша. Князь же Гердень совокупи околе себе силу литовскую и погонися по них и яко уведаша плесковичи погоню, отслаша полон, а сами сташа крепко противу им о сю сторону Двины. Литва же начаша бродитися на сю сторону, тогда плесковичи сняшася с ними; и пособи Бог князю Довмонту с плесковичи, и множество много их побиша, а инии в реце истопоша, толко убежа один князь Гердень в мале дружине, плесковичи же придоша вси здоровы. Того же лета, на зиму, ходиша пакы плесковичи на Литву с князем Довмонтом. Того же лета приде князь Ярслав в Новгород с полкы низовскими, хотя ити на Плесков на Довмонта. Новгородцы же взбраниша ему, глаголюще: «оли, княже, тобе с нами уведавшеся, тоже ехати в Плесков»; князь же отсла полкы назад.

В лето 6776 (1268). Совокупиша вси князи в Новгороде: Дмитрии, Святослав, брат его Михайло, Костянтин, Юрьи, Ярополк, Довмонт Плесковский, и инех князей неколико, поидоша к Раковору месяца генваря 23. И яко быша на реце Кеголе, и ту усретоша стоящ полк немецкий, и бе видети яко лес, бе бо совокупилася вся земля Немецкая. И яко сступишася, бысть страшно побоище, яко не видали ни отцы, ни деды. Пособи Бог князю Димитрию и новгородцем, месяца февраля 18, на память святого отца Лва, в субботу сыропустную, и гониша их, биюче, и до города, в три пути, на семи верст, якоже не моги ни коневи ступити трупием.

В лето 6777 (1269). Придоша немцы в силе велице под Плесков в неделю всех святых, и приступишиша к городу, и не успеша ничтоже, но большую рану всприяша, и стояша 10 днии. Новгородцы же с князем Юрьем погонишася по них, инии на конех, а инии в насадах поехаша вборзе, и яко уведаша немцы новгородский полк, побегоша за реку. Новгородцы же приехаша в Плесков и взяша мир чрез реку на всеи воли новгородскои.

В лето 6790 (1284). Андреи князь Александрович со Сменом Толигневицем цесареви би чолом на брата своего на Дмитрия, и вздыну рать татарскую и взяа Переяславль на щит; а князь Дмитрии выступи с мужи своими и со двором своим, и поиха мимо Новгорода хотя в Копорью. Новгородци же изидоша вси полком противу, на озеро Илмерь; князь же Копорьи отступися, а новгородцы князю путь показаша, а не яша его, а две дщери его и бояры его с женами и с детми приведоша в Новегород в таль: «даь мужи твои выступятся ис Копорьи, тоже пустим их», и поехаша разно месяца генваря в 1. Того же дни изгони Домонт Ладогу ис Копорья и поимаша всь княж товар Дмитриев, и задроша и ладозкого, и везоша и в Копорью на Васильев день. А новгородцы послаша по Андрея князя, а сами идоша к Копорьи, мужи Дмитриеве выступиша из города, показаша им путь новгородци, а город розгребоша.

В лето 6806 (1298). В зиме изгониша немцы Плесков и много зла створиша; посад пожжен бысть, а по монастырем все чернцы исекоша, и плесковици ж с князем Домонтом, укрепившеся Богом и святою Богородицею, прогнаша их, давши им рану не малу.

В лето 6807 (1299). Того же лета преставися Довмонт, князь плесковский, много пострадав за святую Софью и за святую Троицу.

Данный текст является ознакомительным фрагментом.