Приложение 1. Псковские 1-я, 2-я и 3-я летописи о XIII веке (Составлены в Пскове в середине XV века)

Приложение 1. Псковские 1-я, 2-я и 3-я летописи о XIII веке

(Составлены в Пскове в середине XV века)

В лето 6710 (1202). Знамение явися на небеси: яко небо кроваво.

В лето 6713 (1205). Сие пакы ино знамение велико явися на небеси: три солнца.

В лето 6722 (1214). В недилю сырную бысть гром на небеси.

В лето 6724 (1216). Бысть в Новегороде голод зол вельми.

В лето 6732 (1224). Бишася суздальцы с Татары на Калках, и избиша татарове суздальцев месяца маия 31 день. Того же лета великий глад был.

В лето 6736 (1228). Приидоша полки к Ярославу из Переяславля в Новгород, хотяше итти на Риху. Псковичи же то сведавши, послаша к Ярославу, глаголюще: тебе, княже, кланяемся, не ходи к еам, мы с рижаны мир взяли, а на путь с вами не идем; ходили есте к Колываню и сребро взясте, а правды не учинисте, тако же и в Кеси, а сами отоидосте в Новгород, только раздраживше и за то нашу братью немцы избиша, а иных в полон свели; аще тако здумали есте, то и мы противу вас со святою Богородицею. То слышавше новгородцы и реша князю: мы без своеи братьи пскович не идем же; бе бо пскович подвели немцы, чюдь и латыгору и лить. И отпусти Ярослав полки восвояси; а кои и были люди во Пскове Ярославли, тех псковичи выгнаша изо Пскова.

В лето 6738 (1230). Индикта 3 месяца майа в 14 день, бысть знамение в солнцы, в 3 час дни. Того же лета побил мраз жита всюду, и бысть глад зол по всеи земли, яко же не бывало николи же тако: мряхуть бо людие по улицам, и некому бяше хоронити их, но ядяхуть и пси, яко скот мертвый. И живии мужи или жены прихожаху к гробом, плачуше со слезами горькими и глаголюше: лучше вам, преже всего часа горкого изомроша, а нам люте, видеше сию тучу и печаль. Ядяхуть бо тогда людие конину во святые посты. И иное зло писал бых, но горе и тако.

В лето 6741 (1233). Изгониша Избореск Борисова чадь с князем Ярославом Владимировичем и с немцы, псковичи же, оступивше Избореск, изымаша князя, а немчина Данила убиша, а инии побегоша.

В лето 6742 (1234). Иде Ярослав с новгородцы и с полки своими на Немцы, под Юрьев и сташа, не дошед города, и пусти вои воевати в зажитье. Немцы же из городов высунушася, а инии из Медвежьей головы на сторожеи, и бишася с ними до полку. И князь Ярослав с новгородцы поступивше бишася до реце до Омовже, и немцы обломишася, истопоша их много, а инии уязвении убегоша в Юрьев, а инии в Медвежью голову; а опустошиша около Юрьева обили. И поклонишася немцы князю и, смирившеся, отоидоша.

В лето 6746 (1238). Прииде царь Батый ратию и силою татарской на землю Русскую, и плениша грады многи, и идоша и до Игнаца хреста, и ту возвратишася.

В лето 6747 (1239). Избиша Литва на Камне пскович засадою, месяца сентября в 25 день.

В лето 6748 (1240). Приидоша немцы Швеянь в реку Неву, и победи их князь Александр с мужи новгородцы, месяца майа в 15 день.

В лето 6748 (1240). Избиша немцы пскович под Изборском 600 муж, месяца сентября в 16 день. И по сем пришедше немцы и взяша град Псков, и седоша немцы в Пскове 2 лета.

Взяша немцы, медвежане и вельянцы, юрьевцы с князем Ярославом Володимировичем Избореск, и выидоша псковичи и бишася с ними, и побиша я немцы, а иных руками яша, и пришед под Псков, посад пожгоша и сташа под городом неделю, и отидоша, поимав дети у добрых людей в таль. Бяху бо перевет держали с немцы плесковичи: подвел Твердила Иванкович с инемы, а сам нача владети Псковом с немцы, воюа села новгородцкая, а инии плесковичи виидоша в Новгород с женами и детми.

В лето 6749 (1241). Взя князь Александр городок Копорию, а немцев изби. А на другое лето ходил князь Александр с мужи новгородцы, и бишася на леду с немцами.

В лето 6750 (1242). Пришед князь Александр и изби немец во граде Пскове, и град Псков избави от безбожных немец, помощию святыя Троица. И бишася с ними на леду, и пособи Бог князю Александру и мужем новгородцам и псковичам, овы изби и овы связав босы поведе по леду. Сии бои бысть месяца апреля в 1 день; и бысть во граде Пскове радость велия. И рече князь Александр: «О муже псковичи, се же вам глаголю: аще кто и напослед моих пленник или прибежит кто в печали или тако приидет жити во град Псков, а вы его не приимете и не почтете его, и наречетеся вторая жидова».

В лето 6755 (1247). Избиша Литва пскович на Кудепи, месяца июля в 3 день.

В лето 6772 (1262). Ходиша Ярослав Ярославич и Дмитрий Александрович и Товтивил Полочский, новгородцы и псковичи и полочаны под Юрьев, единым приступом три стены взяша, а немцы избиша, а самы здоровы придоша.

В лето 6773 (1265). Взя Воишегл землю Литовскую, а Домонт прибеже в Псков и крестися.

В лето 6774 (1266). Ходил князь Домонт с мужи псковичи, и плени землю литовскую, и погону побиша.

В лето 6776 (1268). Князь Дмитреи и Ярослав с полки новгородскими идоша к Раковору и бысть побоище силно, месяца февраля в 18 день, в суботу.

Князь Домонт с мужи своими псковичи иде к Раковору, и бишася с немцы и одолеша. Тою же лета, месяца априля 23, князь Домонт изби немец 8 сот на реце на Мироповне. И по том пакы, того же лета, князь местер, совокупи воя многы и прииде ко Пскову; и князь Довмонт победи я, и тако побегоша посрамлени, месяца июня 18, на память святого мученика Феодора Стратилата.

В лето 6792 (1284). Бысть знамение в луне, месяца декабря 24, в день недельный. И по двою недель месяца января во 12 день, избиша немцы пскович на дани, у Волысту, 40 муж; якоже древле и хронографы глаголют, яко знамение несть на добро, но на зло присно является.

В лето 6801 (1293). Князь великии Дмитрии Александрович прибеже в Псков, и прияша и честно.

В лето 6807 (1299). Бысть знамение в луне, месяца сентября во 8 день. Тое же зимы изгониша немцы ратию посад у Пскова, месяца марта в 4 день, избиша черньцов и черниц и убогия и жены и малые дети, а мужи Бог ублюде. И на утрии же день приступиша ко граду, хотяше град Псков пленити, а князя Довмонта руками няти. Домонт же князь выехав со Иваном Дорогомиловичем и с мужи псковичи, и помощию святые Троицы воополчившеся и ударишася на безбожных немец и победиша я у святого Петра и Павла на брезе; овы избиша, а иныя поимаша живы, а прочии вскоре устремишася на брег. Тогда же мор бяше на людех. Тогда же и Благоверный князь Домонт преставися, месяца маиа 20 день; и плакахуся его много псковичи, и положиша его в дому святыя Троицы.

В лето 6811 (1303). Бысть зима тепла без снега и бысть хлеб дорог велми. Того же лета Избореск поставлен бысть на новом месте.

В лето 6816 (1308). Борис посадник замысли помостити Торговище, и бысть всем людем добро.

В лето 6817 (1309). Борис посадник с плесковичи заложи стену плитяну от святого Петра и Павла к Великой реке.

В лето 6818 (1310). Заложена бысть церковь святыя Богородица на Снетныя горы, каменая, при игумене Иове, и совершена бысть в лето 6819.